السلام عليكم ورحمه الله وبركاته
اسعد الله صباحكم بكل خير اسعد الله مسائكم بكل خير ^
الواحد اليا منه كان بـ اجازه ومتعودن على السهر
وتقضي اجازته ويبداء الدوام يبلش عشان يعدل نومه
عشان كذا نومي مخبوص ويبي اعدله
واحسن شي انه صار دوامي قريب من البيت
احسن من زحمه الوشم والملك فهد اول
هـ الموضوع من فتره ودي اكتب عنه لكن مشاغل الدنيا واجد الله لايشغلنا الا بطاعته
التعليم من تالي صاير دجه من عقب الوزير محمد بن احمد الرشيد !
تذكرونه ؟
الحين صاير يكتب بـ جريده الرياض مقالات ولاحدن يطريه الا يحمد ربه ان ذكرته بموضوعي
ذا والا ربعنا الواحد لاصار بوظيفه مهمه كلهم يسئلون عنه ويوم يتقاعد ولاحدن يصبح عليك
وبعده جاء الوزير الدكتور عبدالله بن صالح العبيد
وكان التعليم على وقته فيه شوي تطوير ولكن
هيبه المعلم كان البعض يحسب لها حساب ! نتكلم عن التعليم اول ! الي لاحقو على عهد الملك خالد.. يقولون ان الدراسه كان فيها فطور على حساب الحكومه والتعليم صدق على عزه والمعلمين يضرب لهم الف حساب !
وعلى عهد الملك فهد رحمه الله .. كان التعليم كويس وزين والمعلمين لهم ثقلهم والواحد اليا شاف المدرس يرتعب ومايناظر فيه ويحترمه ويضرب له الف حساب !
اول ماكنا نشوف اجازات مثل الحين اول الي نعرفه
اجازه عيد الفطر وعيد الاضحى ونهايه الفصل الاول بس !
ورمضان كان دراسه والفصل الثاني اتعب فصل لانه دعسه وحده
لين الصيفيه ويوم تجي الصيفيه لها طعم خاص يعني مكروف
كرف وتجيك ثلاث اشهر بعد التعب وش زينها
حتى الكتب تصرف لنا ماكنا نشري كتب من برى الا
اللهم الصحف والنشاطات الي بالمدرسه كنا نشريها
وكانت اطلق حصصه عندي حصه الفنيه ماعني ماعرف ارسم الا جيب ربع وددسن وخيمه وعلى قوله مدرس الفنيه الله يذكره بالخير الاستاذ يحى انت ماترسم الا البيئه الي انت عايشن فيها
التعبير صار ماده وصار لها كتاب ؟
هاك اليوم دق علي خالي قال سلطان تعال وخذ ولدي وده المكتبه يشتري كتاب التعبير عجزان اروح اوديه
المهم جيت وخذيت ولد خالي هو بصف سادس ورحنا مكتبه قلت له نايف التعبير صار له كتاب ؟
قال اييييييه !
عاد انا قمت اسولف عليه واقوله عن ايام اول
/ يعني التعبير ماكنا ناخذ الا دفتر ابو اربعين
ومانكتب واجد وكل دروس التعبير معروفه !
اكتب تعبير عن الوطن !
واكتب عن منطقه الرياض !
يعني خليتوها ماده اصرفو الكتب لـ الطلبه مو كل طالب ضروفه
الماديه تسمح انه يشري الكتاب !
ولا كل طالب يقدر يوفر 10 مدري 15 قيمه الكتاب !
هذا غير اذا فيه كتب ثانيه يشرونها الطلاب على حسابهم !
غير طلبات المدارس الحكوميه المستآجره !
اذا بيضبطون الملعب خلو الطلاب يقطون 100 ريال
اذا بيصبغون فصل يقطون 100 ريال
والطالبات نفس الحاله لهم طلبات ماتخلص !
وياليت الاخوات يذكرن لنا الطلبات من اول شلون
واذا واذاا والخ...!
يعني معقوله كل مدرسه مالها ميزانيه بالسنه ؟
وفوق هذا كله التعليم الحين ماش لااحترام لـ المدرسين
ولا شي تلقى الطالب يرفع صوته على المدرس واحيان يمد يده عليه ؟
الدوله كل سنه ترصد مليارات لـ المدارس المفروض على الميزانيات نشوف كل مدارسنا نموذجيه كامله من كل شي !
1- مصادر التعلم
2-معامل العلوم
3-معمل الفنيه
4-ملاعب
5-مقاصف واكل صحي
لكن نص مدارسنا مستآجره حتى مدرستي الي درست فيها كانت ولا زلت لـ الحين مستأجره ! الابتدائيه تأسست عام 1404هـ عمر المدرسه 28 سنه
وكل ثلاث سنوات يرقعون بالمدرسه ويصبغون !
جيتها الاسبوع الي راح كل المدرسين الاولين فيه الا ثلاثه منهم واحد توفى الله يرحمه واثنين نقلو،
جلست اسولف مع المدرسين واتذكر ايام اول وكلهم يقولون من دخلت علينا على طول عرفناك
وش اقول وش اتكلم بس عن التعليم ؟
المفروض يلغون المقاصف المدرسيه ويستبدلونها بـ ميز نفس العسكر ونفس المدارس
بـ امريكا يعني مو شرط غدا اقل شي وجبه فطور صحيه
مو وجبات كاكو فلافل يابسه وعصير ربيع حار والله يديم النعمه !
والي الفصول 40 طالب بـ فصل كان سابقآ مقلط الرجال !
والمدير مجلس الرجال. والمدرسين غرفتهم بالصاله .؟
والملعب بالحوش على البلاط وفارشين به فرشى خضراء من حقت المطابخ ؟
^
هذي واقع المدارس الحكوميه الي انا درست فيها
الى اولى ثانوي والباقي كملته في مدرسه اهليه !
وياكثر الاجازات والله ما احسد هالجيل الا على الاجازات !
مره اجازه القمه .واليوم الوطني !
واذا صار عج وقفو الدراسه
واذا صار فيه مطر قوي وقفو الدراسه !
بركاتك يا الاميره عادله ياحرم وزير التربيه
بدل المهايط الي نشوفه طور المدارس ورجعو
هيبه المعلمين الي صارو يخافون من الطلاب !
واتعليمااااه !
في الختام :
الكلام واجد وخير الكلام ماقل ودل !
هذا الموضوع كان ماخذن حيز كبير في خاطري
وانزاح عقب مافضفضت وقلت الي بخاطري عن التعليم ،
على فكره ماحطيت صوره الوزير التالي لانه من مسك الوزاره والتعليم مدحدر !
وغير كذا ماهضمته ابد !
وعطونا أرائكم وتعليقاتكم وطلبات المدارس منكم اول والي درس بـ حكوميه والا اهليه !
الإهداءات
واتعليمااااه !
العرض العادي
