جميع محاورات الشاعر سفر الدغيلبي ( كتابية )

[عمر الدغيلبي]

السلام عليكم ورحمة الله وبركاته

هذه مكتبة كتابية لجميع محاورات الشاعر

سفر بن سعد الدغيلبي في موضوع واحد

>> والتحديث مستمر <<


المحاورة الأولى :

الشاعر سفر الدغيلبي و الشاعر فلاح الحنـّان



ســــــــــــــــــفـر


سلام الله سلام الصاحب اللي يعرف الاصحاب = على الغلبا هل الوديـان وسبيـع الحداريـه
نحاول فالزمان المستحيل ونبـذل الاسبـاب = وصار اسلاحنا الفتاك طيـب العـزم والنيـه



الحنــــــــــــــــان




هلا بالناطق الرسمي عن اهل الماقف الغصاب = عن الهيلا وهـاذي كلمـةٍ ماهيـب سريـه
وكلٍ يعرف عتيبه من الاصحـاب والاجنـاب = وش اللي مستحيل وكايـدك ياحامـي الهيـه



ســـــــــــــــــفـر


ترا للوقوف آداب مثل ماللجلـوس آداب = ولانامرك تاقف وقفةٍ ماهيب شرعيـه
ذبحنا الحيه الرقطا عليكم تذبحون الداب = وانا ماشوف فرق بعيد بين الداب والحيه



الحنــــــــــــــان




يازينك ياجناح الحر لآشرف علـى المرقـاب = تقول انه قمر من عرض الاقمـار الصناعيـه
لاجيت انسا عصى موسى يذكرني بها المشعاب = ذبـح حيـه وباقـي حيـةٍ ماهـي طبيعيـه



ســــــــــــــــفر




خوالي ياخوالي ياهل الاحساب والانسـاب = درينا بالحقايق عبـر الاحـداث الحقيقيـه
تحيزمتوا جميع بسيف ابوطالب ورمح ذياب = ونسبة نصركم فالمعركه عشرين فالميـه



الحنــــــــــــــــان




بلانا الليل الاسود والقمر من طيب حظك غاب = وسدينـا عليـك الريـع خيالـه ورجلـيـه
وسندت الشعيب اللي تقطع دونـه الاسبـاب = حشرناك وحشرك الله بيـن الذيـب ووخيـه



ســـــــــــــــــفر



نعلم مانعلم لايزال الجهل فالأعـراب = يبون يناطحون بروسهم غارات جويه
ياجاهلنا بداية حربنا تثويرة الاعصاب = وخاتمته مانترك فالبسيطه كاينه حيه



الحنـــــــــــــــان


ترانا مسلميـن وعلمنـا مايفـرق الاحبـاب = وبعض الناس تعليميـه بالافعـال الاجراميـه
عليك حساب من ربي ومن خلقه عليك احساب = تلمس راسك اللي تركزه مـن غيـر طاقيـه



ســـــــــــــــــفر



لاتحسبني مشجع للغدر والعنف والأرهاب = انا مسلم سعودي وآتفاخـر بالسعوديـه
ترا يوم القيامه يكشف الصادق من الكذاب = تعمل الناس والعبره فالاعمال الختاميـه



الحنـــــــــــــــان


أخبر انك على وضح النقا يامجري الهياب = ولا نبغـى نفكـر بالتفاكيـر الجنونيـه
وهاذي ميزةٍ فينا ورثناها مـن الشيـاب = مثاليين مثل الرايـه الخضـرا المثاليـه




الرجاء عدم الرد على الموضوع

لحين الإنتهاء منه

تـــــــــــــــــــــــابـــــــــــــ ع

[عمر الدغيلبي]

المحاورة الثانية :

محاورة الشاعر سفر الدغيلبي والشاعر صقر البقيلي



سفر الدغيلبي


يامرحبا ترحيب تنقله الهواتف بالسلـوك
يدخل ابيوت الناس عبرالاجهزه وارسالها
الارض ثار غبارها لين اصبحت دكادكوك
مدام عقال العرب تركـض ورى جهالهـا




صقر البقيلي


دام البقاءوالله يعز الدين ويعـز الملـوك
والتقنيه ماتخلف اشراف العرب عن حالها
تجار الاسم من فلسهم غيرو وضع البنوك
والي ماوصلو جالها يستنزفـون اموالهـا




سفر الدغيلبي


يامحللين الهرج مافيناولا فيكم شكـوك
جمله وحملـه مـن يبايشتالهايشتالهـا
خط الصداقه ياصقرومحادثات(البالتوك)
توديعهامهما يكون احسن من استقبالها





صقر البقيلي


انته زرعة الخط كله وردورد وشوك شوك
حيله وحملتهاوشرهتهـا علـى محتالهـا
لوقلت عند البدو رواد الفضاء على المكوك
قالو ياليت الكلمـه الـي قالهـا ماقالهـا




سفر الدغيلبي




الربع بعلوم اللكاعه علموك ولكعـوك
على ماقيل الله يخلي لرجال ارجالهـا
شف لعبة التجار ناتجها مدبر ومحبوك
بضاعتن فالسوق ويروج لها دلالهـا





صقر البقيلي



ياطيبكم ياصحابنا وقت السوالف والضحوك
ولا لياجـات الله الله للحـمـول اجمالـهـا
الي سرت من زملكم ماهي سوات الي بروك
الي بروك بشدهـا والـي سـرت بعقالهـا




سفر الدغيلبي


حنا نسيرقافلتنا من عسير اليا تبـوك
القافله تمشـي ومـن يبرالهايبرالهـا
الي ملكهابالحقايق والوثايق والصكوك
ماهوب مثل الي يحاولها ولايحتالهـا





صقر البقيلي


حنا عبرنا الجو وانته بالقوافـل ولعـوك
لـو القوافـل فـل حملتهاتحصـل فالهـا
ترى الحقايق عندنامن جد ماهي ملك ابوك
ماهو مصير الي يحاول حاجتن ماطالهـا



تـــــــــــــــــــــــــــابــــــــــ ــــــــ ع

[عمر الدغيلبي]

المحاورة الثالثة :


محاورة الشاعر سفر الدغيلبي والشاعر تركي 2000




تــــــــــركـــــــــــي




سلام تسليمتن تسوى رصيـد اهـل الملاييـن
ابديبهـا للقبايـل فـي محـل اهـل الشهامـة
يابن سعد صاحبك وشقاللك من قبـل يوميـن
الرجـال مايسحـب السكيـن ويقطـع حزامـه



ســـــــــــفـــــــــــر




يامرحبا الفين ضرب الفين تنصى تركي الفين
نكمـل تراحيبنـا بالفعـل لمكمـل سـلامـه
الي يبا يرضي الاقصيـن لحسـاب المواليـن
هذاك قله يويـق الصبـح فـي ريـع الندامـة



تــــــــــركـــــــــــي




الضرب والجمع في الاعداد والى في الميادين
ياراعي البشت لبس البشت مـع راع العمامـة
اضن لبنان راحت مثـل ماراحـت فلسطيـن
مابقـي الا تهـب الريـح وتـقـوم القيـامـة



ســـــــــــفـــــــــــر




اخذتلك في ضواحي نجد والصمـان شهريـن
واليوم كنك تبا المعـواد فـي ساحـل تهامـة
يابيلنا معركـة كبـرى تشابـه يـوم حطيـن
حتـى نبشـر مـدورت السلامـة بالسـلامـة




تــــــــــركـــــــــــي




صاحي ويمشي مع الصاحين ويكب المجانيين
والي رقد في فراشـه مايصحـا مـن منامـه
طاحت ضروس الجمل ماباقي الا فيه ضرسين
والمشكلة كـان لامنـه بـرك ثقلـت عظامـة



ســـــــــــفـــــــــــر




يومنها حرب هرج ومرج بالعـون معذوريـن
ويمنها شوف عين لعين عيـب الانهزامـة (1)
تقول الامثال لاطاح الجمل جـات السكاكيـن
واللوم ينصى البعير ولا على الخوصة ملامـة



تــــــــــركـــــــــــي


اليـا استعـدت حنـا يالعتيبـي مستعـديـن
.الخوف مايجلس الـى فـوق بيبـان الرخامـة
ياطير من بعد ماجالـك مخاليـب وجناحيـن-
خوى القرانيس لاترجع علـى بيـض الحمامـة



ســـــــــــفـــــــــــر



وين استعديت وانته نازح من ثـرب ويميـن
حربن عبر شاشـة الجـوال مامنهـا زعامـة
انكرتنـا عـام الاول يـوم لبسنـاك ثوبيـن
ثوبـن ملـون وثوبـن مثـل بـراق الغمامـة



تــــــــــركـــــــــــي




الله ولا الديرة الي ماسكنهـا الـى الشياطيـن
البعـد عنهـا نهايـة بخـل وبدايـة كـرامـة
العام قلولـي انـك صـرت امـام للمصليـن
واليوم تـذن ليامنـك خلصـت مـن الاقامـة



ســـــــــــفـــــــــــر




الخوف والضعف يالمطران يخلـن المراحيـن
والله لو الخـوف عـز لتدمـر العالـم نعامـة
تسعير بعض العرب في سوقنا تسعير بنزيـن
تسعين لكن طويل العمـر غيـر فـي نظامـة



تــــــــــركـــــــــــي




علامتك ياطويل العمر بيـن الخشـم والعيـن
وشلون جت فيـك والعتبـان مافيهـم علامـة
صحيح والناس فيهم نـاس ماتسـوى رياليـن
وبداية الوقـت يابوزيـد يـدري عـن ختامـه


ســـــــــــفـــــــــــر


تجميع تركي سعودي والقطع من دولة الصين
والبدي مصبوغ والهيكل مثـل عـود الثمامـة




تـــــــــــــــــابــــــــــــــــــــ ـ ع

[عمر الدغيلبي]

المحاورة الرابعة :


محاورة الشاعر سفر الدغيلبي والشاعر بخيت السناني في منتديات قبيلة جهينة




سفر الدغيلبي


الاوله بالتحيـة والتحيـة سـلام
سلام مني عليكـم ياهـل المنتـدا
والثانية فاضت الأنعام والطير حام
الليل يلقى عشا والصبح يلقـا غـدا




بخيت السناني


يامرحبا عد ماصلى المصلي وصام
ترحيب يرضي ضميرك يابعيد المداا
الصيد ملي البحر والخير قبله وشام
واللي بجال البحر ماجاه غير النـداا




سفر الدغيلبي


عاملتكم بالوفا والطيب والاحتـرام
وعاهدتكم مايجيكم مـن جنابـي ردا
واليوم بعد استقام الوضع والحظ قام
لاتزعلون الصديق وتفرحون العـدا



بخيت السناني



الطيب ماهو غريب من الرجال الكرام
وانته جمعت المراجـل كلهـا ماعـداا
العز ماهو منامك فوق ريش النعـاام
العز وقفتك قـدم الجيـش يـوم الفـدا




سفر الدغيلبي



لاصرت واثق بنفسي مايهم الكلام
هيـا تكلـم وعبـر دام مالـك جـدا
واللي يبا الحرب من بكرع يشدد الحزام
نسحل حديد المعادي لين نجلا الصـدا



بخيت السناني



النور يشرق من المشرق ويجلى الظلااام
وكلٍ يسافر على دربـه متـى مابـدا
أن جيت حطيتها بين اللحـم والعظـاام
وعزو بعضكم لياراحت عليكـم سـدا




تــــــــــــــــــابــــــــــــ ع

[عمر الدغيلبي]

المحاورة الخامسة :


محاورة الشاعر سفر الدغيلبي والشاعر حبيب العازمي



حبيب


ياسفر كل ماسافرت يـم الحجـاز
شوشت موجة الرادي على الاسلكي
إكشفتك المحطه عبر صوت الجهاز
وانت فالمجلس اللي فآخره متكـي



سفر


اعتزازي يعز اهل النفوس العـزاز
إحزني ياعداي ويااصدقاي اضحكي
وانت يالدبلوماسي بعد سحب الجواز
كلنا قبل هـاذي نحسبنـك ذكـي



حبيب


شبت النار وانته فوقها تصب قاز
انت قصدك تشب النار والا حكي
كل كسر يجبرغيير كسر القزاز
القزازه بلاشي فوقهـا ترتكـي



سفر



نارنا كل ماشبت يجيك اهتزاز
تشتكي ياحبيب والحطب يشتكي
فلة القوم مابنيت بساسٍ عزاز
والخلل من مهندسها محمد زكي




حبيب



انت رجلٍ تحاربنا بكل اعتزاز
والفلك فوق راسك دار يالفيلكي
لو بغينا نهد البير والارتـواز
يصبح الحنبلي في ذمة المالكي



سفر



دام فيك المصايب والجرب والنحاز
إهدري ياجمال عقيل ثـم ابركـي
يامنشب رجولك فالطريق الغـراز
مسلكك فالحياه بعيد عـن مسلكـي

حبيب



خل حناك عندك صر والعيد جاز
يامجمع من الحشوان والحكحكـي
والله انك صدقت وتاخذ الامتياز
مسلكك دربكي وتدور الدربكـي



سفر



كان هارون يحكمها على أحدث طراز
مير هارون لحقـه خالـه البرمكـي
القرايه يرتلهـا الأمـام ابـن بـاز
إهلكـي ياشياطيـن العبـاد أهلكـي


حبيب

ياهل حويته اللي تلبسـون الغـراز
إتركوها ولو فالوضع صار اعركي
إنتهت موضة التبذيـر والابتـزاز
إنتبه ربـك الله معـه لاتشركـي


سفر



يارجالٍ ليا ريزت خفيفـة مـراز
ماجبرت الحمام إيطيح وسط اشبكي
بارد القلب حاز وقاسي القلب فـاز
ولعت يادخاخين الجحيـم اسمكـي



تـــــــــــــــــــابــــــــــــــ ع

[عمر الدغيلبي]

المحاورة السادسة :


محاورة الشاعر سفر الدغيلبي و الشاعر علي الشيب



الشيب

قم ياسفر لاتسافر للسعودية
نبا نسفرك في رحلة علاجية
والله ماتنفلت من قبضة ايدية
عزي لمن نجدته ماهي من ذراعة

هلا يامرحبا ترحيب مني على الضيفان.........................نيابة عن مطير العز لاذكرت عزاويها
تقدم ياسفر دامك تمثل ربعك العتبان...........................ترى نار المعارك مالها الامن يصاليها




سفر

ياوقت ياوقت منك الله يكفينا
تخرب الشعرالاصيل وتدمر ليالينا
حتى صغار الاجاويد اطمعت فينا
عزي..................................... ......

انامحتار في وضع الولد بسم الله الرحمان................ضيوف الخير بيرحبها والايداويها
بدينا فالشوايبيوم خلصنا من السكان......................مطير اوضاعها تال الزمن فيها ومافيها




الشيب

والله لاطوعك حتى ماتحداني
وليا بغيت الحقيقة منت وياني
حنا هل الخيل وقت الفعل فرساني
عزي..................................... .

تقدمنا على عز وشرف ومصامخ العدوان.................وروس يالعتيبي ترتفع ناطا عليا
عتيبه ياعتيبه لاتفكون الولد نعسان.......................على قول الرجال انته على راسك تضويها




سفر

الله يخليك لامك لوتهددني
هدد وصيح وهرجك مينقدني
اقولك ليش ازيد وتقول زودني
عزي..................................

شباب الجيل يبون القصيد مصارعة ثيران...................وهاذي عيب عند الناس حاظرها وماضيها



الشيب

مبغى شهادتك تشهدلي مع العالم
ياليت تطلع من الميدان وتسالم
حتى نقنن من المضلوم والضالم
عزي...................................

تركد ياسفر دامك تعرف لهيبت المطران........................جنون الارض نحشرها جيوش القوم نفنيها
الايالطرقي الي جيت لازم تطرق البيبان.......................قبل ترميبك الامواج سفلها علاويها



سفر

تراي مضلوم يوم اهرج مع اشكالك
وتراي ظالم لو استولي على امثالك
لابارك الله يا الألفين فعيالك
عزي..................................... ......


هذا افضل طالب في مدرسه تركي ولد ميزان........................واظن المدرسه حاميها حراميها



تــــــــــــــــــــــابــــــــ ع

[عمر الدغيلبي]

المحاورة السابعة :


محاورة الشاعر سفر الدغيلبي والشاعر عبدالله الأشرم




سفر الدغيلبي



سـلام يـا وسّامـة الكفـه بعيديـن الديـار
بعيـد بالماضـي وقربهـا زمـان العولمـه
عبدالله الاشرم خذى رخصه من الروس الكبار
لكن قولوا له تـرى ماكـل بيضـاء بشحمـه




عبدالله الاشرم




يـا مرحبـا بعتيبـه الهيـلا متعبـة المهـار
ذباحة الحيـل السمـان وكـل عايـل تلطمـه
ما ناخذ الرخصه وحنا اهل الوفاء واهل القرار
وأحسب حسابك قبل تغـرق بالبحورالمظلمـه




سفر الدغيلبي



مرارة الهيجا تعوضها حالات الانتصار
ليتك تعيش الانتصـار وتـذوق طعمـه
تقولها والامر لله ثـم لطـوال العمـار
يوم أكثر العربان متساوي وجوده وعدمه




عبدالله الاشرم




حولت من ضلع تفتش فيه ما تلقى حجـار
وسببتلك فتنه مع العالـم وكيـد وهيلمـه
يوم المشوك بالسما ضوة مثل شمس النهار
كلن موقف عنـد حـده والديـار مقسمـه




سفر الدغيلبي




دامك نجم تطبق على مثلك شروط الاحتكار
ماهي خساره عند شرواك العقود المبرمـه
با عبس ما ينفع حليبٍ يجرح لسان الحوار
مير أتركوه يموت والا دوروا من يفطمـه




عبدالله الاشرم




مدام شرواكم معنـا زندنـا يقـدح شـرار
واللي معه محزم يقوم ويحتزم في محزمه
ياللي تطالع بالحوار اللي رضع در البكـار
وشلون شفت الجرح بالسانه وهو داخل فمه




سفر الدغيلبي


من لا يشوف الناس قبه ما يشوفونـه مـزار
هذا مثل مفهوم قصده وأنـت يمكـن تفهمـه
صار لك عشر سنين وأنته مختفي خلف الستار
واليوم مستدعيـك للتحقيـق شيـخ المحكمـه




عبدالله الاشرم




من ودّع اصحاب اليمين ورافق أصحاب اليسار
هذاك مثل اللي بنـى بيـت المعـزه وأهدمـه
أنا تراني حر وأجلس في مجاليـس الحـرار
ولا حولت للمحكمه غير اللصوص المجرمـه



سفر الدغيلبي




بعض العرب هرجه يسر البال وفعوله دمار
ينادي الضيفان ويهلـي ولا شيـف كرمـه
العود ابو دخان دخانه طلع مـن دون نـار
يحتر ويدخـن ومنتوجـه رمـاده وفحمـه




عبدالله الاشرم




أصل الدمارالهجرة اللي روحت مثل المطار
على الطريق اللي يمر مراه ويمر ضرمـه
العود ابو دخان من مقباس نـارك يانـزار
لكن لاتبني خيامك فـي نحـر واد الرمـه



تــــــــــــــــــــــابـــــــــــــــ ــ ع

[عمر الدغيلبي]

المحاورة الثامنة :


محاورة الشاعر سفر الدغيلبي والشاعر طلق العازمي




طلق بن زاروط العازمي
.
.
.
مرحبا يا سفر جابك الله وجيــت . . . . في ديارٍ تنومسك باصحابها
.
.
ودي انشدك عقب البطا وش لقيت . . . دايم المعرفه حظ كسابها
.
.
.
سفر الدغيلبي
.
.
.
البقابك ونوماسنا كمبليت . . . حاضرٍ بأي ديره وطينابها
.
.
قمت اخايل سحابٍ نشا بالكويت . . . منه كل العرب ثارت اعصابها.
.
.
طلق بن زاروط العازمي
.
.
.
احتزم للمعاني على مابغيــت . . . . وانت قرايها وانت كتابها
.
.
يا اهل الضاحيه وين راع الونيت . . . . سلعت العام مافاز جلابها
.
.
.
سفر الدغيلبي
.
.
.
يوم خليتني فالخلا ماشكيت . . . . كل دعوه تعود لمن جابها
.
.
واصلتك الونيتات في كل بيت .... والشعار الكويتي على ابوابها
.
.
.
طلق بن زاروط العازمي
.
.
.
انت عند النشاما واخذت وعطيت . . .. والنشاما تبا تحسب احسابها
.
.
وانت يا شاعر القوم وينك غديت . . . ناسٍ احضورها يشبه اغيابها.
.
.
سفر الدغيلبي
.
.
.
كيف جنبت عن ماقفك ما استحيت . . . غاشن اللوم لحيتك واشنابها
.
.
وانته ابعيد عن حالنا ما دريت . . . . كم جمالٍ عدل عوجت ارقابها.
.
.
طلق بن زاروط العازمي
.
.
.
وانت اخذ لك وصيه ليامن سريت . . . . علم اهل الوفا تشعب اركابها
.
.
احمد الله كسبت الغنا واغتنيت . . . . لو اشوف الدول كثرت احزابها
.
.
.
سفر الدغيلبي
.
.
.
ماطلبنا العوازم من الخام زيت . . . . بس نبغا علومٍ ضرينابها




تــــــــــــــــــــــــــابـــــــــــ ــــــــ ع

[عمر الدغيلبي]

المحاورة التاسعة :


محاورة الشاعر سفر الدغيلبي والشاعر فهد العازمي



فهد العازمي

ياسلامي على الغياب والحضار
====من ضميرٍ يزيل الهم طاروقـه

شبة النار ياللي تسبـرون النـار
====اضحكو لو زعل واحد من الروقه


سفر الدغيلبي


مرحبا من ضميرِ يبخص الشعار
................ يعرف الشاعر ليا سمع منطوقه

لاتعقد حجاجك والزعل ماصار
............... يافهد لحية الشيطان محلوقه



فهد العازمي


ياسفر و ش بقي من تالي المشوار
=========خل الايـام مطـروده وملحوقـه


الفواسق سبع منها غـراب وفـار
======تندفن تحت الارض وتمترح فوقه



سفر الدغيلبي


جاهل الناس.. يلعب لعبة ( المقطار)
========== وعاقل الناس ..همه مَزع عروقه

ياولد روق قفا موسم المخضار
========== التفت للسلاح اللي بصندوقه


فهد العازمي


طيرناطاروانتم طيركـم ماطـار
========ينفض الريش فوق الوكر بسبوقه
علم الجاهل اللي بين نار وغـار
=======ياسفر باشة السلطان مسروقـه


سفر الدغيلبي


طاح من بيتكم ياهل( النسيم ) جدار
............. تصبغ البيت والديبان فـ شقوقه

عقب ذوق الرحيق اللي من الازهار
............ والله انك لتلقى المر وتذوقه


فهد العازمي


يكبرن المصايب والعقـول كبـار
======== عد هداج ما يوصف علـى لوقـه

تغلى الاسعاروالا ترخص الاسعار
======== الذهب مستحيل يبور فـي سوقـه



سفر الدغيلبي


البلا ان الكبار يعودون صغار؟!!
............... ثم تصير بركات الربع ممحوقه

أهل (الشكشكة) عزافة (القيثار)
................ فالأمور العظايم مالهم طوقه



تــــــــــــــابــــــــــــــــ ع

[عمر الدغيلبي]

المحاورة العاشرة :


محاورة الشاعر سفر الدغيلبي والشاعر محمد بن ثايب الشهراني




ســـــــــفـــــــــر

سلامي سلامي يرضي الناس والنـاس
على قولـة الأمثـال صعـب ٍ رضاهـا
يقولون شهران ابن ثايب خذى الكأس
وحطـه تحـت يمنـاه مـدري وراهـا


بــــــــن ثــــايــــب

هلا مرحبـا ترحيبـة ٍ تقعـد الـراس
بشاعـر عتيبـة طــول الله بقـاهـا
اى والله خذيته والمباني لهـا سـاس
يـوم أنـك تلمـس حاجـة ٍ ماتبـاهـا


ســـــــــفـــــــــر

لعلك على ضني معك ميـز وإحسـاس
تقـدر حقـوق الاخـويـا لأخويـاهـا
عساه اي هناك مع الجواهر ولا للماس
جواهـر خبيـراً غالـي ٍ مشتـراهـا


بــــــــن ثــــايــــب

اى والله معي شيمه ولاهيـب تنقـاس
ولكن علـي ّ شرهـه وفـي مستواهـا
أشوفك تزحر يا سفر كـن بـه بـاس
وهـي كلمتيـن مـن بغـاهـا لقـاهـا


ســـــــــفـــــــــر

اخذ كلمة محصـورة بيـن الأقـواس
ضميرك ونفسـك وشلهـا وش علاهـا
زمان الرخى يا بن العرب يملي أكياس
وذي حالـة ألشـده ّ لعـنـا ثـواهـا


بــــــــن ثــــايــــب

لك الحق والتقديـر يالابـس الطـاس
لكـن ساحـة الميـدان تبغـى رضاهـا
وصولـك مناطقنـا معـزة ونومـاس
وديرتـك بنجيهـا ونـرعـى حيـاهـا


ســـــــــفـــــــــر

تبا تشعل النيران فـي كـل مقبـاس
لكـن السحابـة فوقـك أتهـل مـاهـا
أنا جيتكـم طرقـي مسيـر وعسـاس
عتيبـي لـي حـول بــدار ٍ ولاهــا


بــــــــن ثــــايــــب

يا بو عين زرقاء كن في عينها النعاس
رشيد الزلامـي كاشـف ٍ إلـك خطاهـا
بغى ذالعتيبي يضرب الضلـع بالفـأس
لكن خاف ينشب مقطهـا فـي رشاهـا


ســـــــــفـــــــــر

ترى هوشنا بشلف وحدود الأمـواس
بلاشـي تطلـع بندقـك مـن خبـأهـا
أبرسلك اصحيبك خليـف أبـن دواس
وبـاقـي الاوادم مالـغـاك ابلـغـاهـا


بــــــــن ثــــايــــب


عزمنـا نذريبـك مـع كـل نسنـاس
يـا خـوان بيـت الله وبايـق حماهـا
بسويبه أسواتك يـا ذبـاب الارمـاس
عسى الله يمنـع وجههـا مـع قفاهـا


وإلى لقاء ٍ آخر

[وليف الجرح]

جهد تشكر علية يبن حويفر



معااااافااااا على ذى التميز




تقبل مرروري



دمت بود

*******
**
****
**********
*******************
***
*
******
*********
***
***
**
*
*******
**********************************
*
***
*
*

[عمر الدغيلبي]

جهد تشكر علية يبن حويفر



معااااافااااا على ذى التميز




تقبل مرروري



دمت بود

*******
**
****
**********
*******************
***
*
******
*********
***
***
**
*
*******
**********************************
*
***
*
*


العفو يا مطلق

واشكرك على مرورك

[مشعل ابن صياله]

لاهنت يا عمر وبيض الله وجهك

[عمر الدغيلبي]

لاهنت يا عمر وبيض الله وجهك

ولا انت يا ابو حمدان

ووجهك ابيض يالذيب

واشكرك على مرورك

[عـالـي مستــواهـ]

لأ هنت يا ابو الحميدي وبيض الله وجهك

وشاعر سفر يستاهل

[زائــر]

الله يعطيك العافية

[سعد الدغيلبي]

لاهنت
ثثيال