وابكرتاه:عبدالمعين ابن عقل الثعلي ( رحمه الله )

[مجنون براس عاقل]

وابكرتاه اللي غدت بيـن الاذواد
يوم اصطفاق الطرش من كل نيه
برقا وروق وحرب وآلاد عبـاد
وسبيع والبقمـا هـل الاركيـه
علـى قليـب يدهلـه كـل وراد
وكل يجيله مـن بعيـد النحيـة
ميه يزيد وفوقـه الـورد يـزداد
ولا ماله الغراف من كثـر ميـه
واخذت فوق الما ليا ورد منقـاد
لاعند شـي ولا مـورد ضميـه
وليا على الما واحد قـال يـالاد
وش حاجته قلت اله ويش الك فيه
قال ايه ها مالك على العد مقعاد
قلت اله ابا آخذ مار لثة شويـه
وليا على الما قاعد غيره اجـواد
قالوا هما لك قلت قاعـد هنيـه
قالوا همالك حاجة قلـت نشـاد
مذهب عسى الله مار يعقل عليـه
قالوا همالك ذاهبه قلت وش عاد
وش عاد من مال بقي في يديـه
قالوا هما لك ويش هومالك الغاد
اموالك اللي غادي ويـش هيـه
قلت اه مامعكم خبر مير الامراد
بكره غدت لي بين هاذي وذيـه
عفرا عليها بيـن الوسـم منقـاد
ماهوب نار ولاش وسـم حليـه
هليل بين الحجاجيـن وعضـاد
ورقيمـة فالخـد ماهيـب كيـه
قالوا هماهي غاديه قلت بجمـاد
وتلى لها ذكـر نهـار الضحيـة
قالوا غدت قلت امر الله بمـاراد
قلوا همـا مـا عندنـا مخبريـة
قلت ذهنوها وانشدوا كل من راد
تجسسـوا بالبيـنـه والخفـيـة
قالوا هما هاذي بنشده فقـم نـاد
صوت وسايل كل راعي رعيـة
قلت آه مافاد الندى فيـه مافـاد
هذاه انادي كل صبـح وعشيـه
ومن له ذهيـب ماتهنـا بمقعـاد
ومن لا غدالـه ذاهبـه واهنيـه

[عمر الدغيلبي]

وابكرتاه اللي غدت بيـن الاذواد
يوم اصطفاق الطرش من كل نيه

صح لسانه قصيدة جميله

لاهنت يا الذيب

بيض الله وجهك

[فيـصل الدغيلبي]

الله يرحم الشاعر المخضرم عبدالمعين الثعلي شاعر فحل من فحول الشعراء وقصائده جزله ومنه هالقصيده الرائعه وتسلم اناملك المبدعه يابن العم على نقل هالقصيده

[زائــر]

الله يعطيك العافية