رائعة من روائع الشاعر الكبير

[سمو المشاعر]

رائعة من روائع الشاعر الكبير مبارك الخليفة



ثــلاث كلـمـات مـابـي مـنـك اسمعـهـا = بحروفهـا اللـي علـى الاعـذار مستنـه

لا اغلطـت لـك غلـطـه وودك ترقعـهـا = تـقــول مـــدري واحسـبـنـه ويمـكـنـه

مـدري واحسبـه ويمكـن عنـي اقلعهـا = مـخـي خـلايـاه مــن هاللـفـظ منـجـنـه

دوّر لغـيـري وسـولـف لــه ووزعـهـا = دوّر لمـنـهـو يـحـنّـك كـــذب وتـحـنـه

ياللـي تـوزع علـومـك قـبـل تجمعـهـا = لا صـن صاحبـك فالعـب وايتـه بصنـه

واتـرك طـبـوعٍ بــلا داعــي تطبعـهـا = وارجع على اصلك بلا شكر و بلا منّه

لا تخلـف الهقـوه اللـي فيـك مطمعـهـا = مــا عــاد ينـفـع مـعـك لـكــن ولـكـنـه

شف موقعك والعرب وشلـون موقعهـا = والـنـاس نظراتـهـا سـكـيـن منـسـنـه

مــا فـيــه كـلـمـه تنـزلـهـا وترفـعـهـا = لا تخلـط الصـوت بيـن البـح والخـنـه

والمعـركـه لا جهـلـت الـلـي مولـعـهـا = شـف برقـهـا لاح والـرعـاد لــه دنــه

وان كـان عنـدك علـومٍ خافيـه ذعـهـا = مافـيـه تكـتـيـم دام الـحــرب منـشـنـه

وان غشـتـك صنـعـةٍ كـــل تصنـعـهـا = مــا تــوّك الا عــذاب القـلـب والـونــه

وان غـرتـك لقـمـةٍ فالـبـطـن تبلـعـهـا = بـذكـرك فــي كــلام الـشـرع والسـنـه

الركعـه اللـي علـى الانـظـار تركعـهـا = هي تدخل النـار والا تدخـل الجنـه ؟؟

خــل الـدعــاوي لشـاريـهـا وبايـعـهـا = كـــلٍ عـلــى مهـنـتـه ويكـيـفـه فــنّــه

والفزعـه اللـي نويـت العـام تفزعـهـا = لا تحسب انهـا بوسـط الصـدر منكنـه

انــا عـزومـي تشجعـنـي واشجـعـهـا = واشجـع اللـي يجـي ظنـي علـى ظنـه

وانـت انتبـه مـن عـلـومٍ مــا توقعـهـا = ولسانـك افطـن لـهـرجٍ ينطـلـق مـنـه

ثــلاث كلـمـات مـابـي مـنـه اسمـعـهـا = كلمات مدري .. واحسبنـه .. ويمكنـه